Itsinda ry’abashakashatsi bo muri Israel ryitwa MIGAL rikorera mu kigo cyitwa Galilee, ryatangaje ko riri hafi kuvumbura urukingo rw’icyorezo cya Coronavirus ku buryo rushobora kuboneka mu minsi 90 iri imbere.
Itsinda ry’aba bashakashatsi ryamaze gukora urukingo rushobora kurwanya virus ya Coronavirus yibasira inkoko, ndetse nirwo bari guheraho bakora urukingo rushobora kuba rwakwifashishwa ku muntu mu kuvura COVID-19, Coronavirus iteje ikibazo Isi muri iki gihe.
Aba bashakashatsi bavuze ko hari isano ya hafi hagati ya virus ya Coronavirus yibasira inkoko n’imaze kugaragara mu bantu.
Umuyobozi Mukuru wa MIGAL, David Zigdon, yabwiye abanyamakuru ko bitewe n’uburyo hakenewe igisubizo ku rukingo rwa Coronavirus, bari gukora ibishoboka byose kugira ngo rube rwaboneka.
Ati “Intego yacu ni ugukora urukingo mu byumweru biri hagati y’umunani n’icumi biri imbere, no kubona ko rwemewe ko nta kibazo rwatera nibura mu minsi 90.”
Kugeza ubu abantu barenga 2900 ku Isi bamaze guhitanwa n’iki cyorezo, umubare munini uri mu Bushinwa. Ku Isi hamaze kugaragara abantu 85000 bafite ibimenyetso byayo.
